Në kuadër të vizitës në Lituani, zëvendësministri i Punëve të Jashtme dhe Diasporës, Kreshnik Ahmeti, takoi kryesuesin e delegacionit të Lituanisë në Asamblenë Parlamentare të Këshillit të Evropës, Emanuelis Zingeris dhe anëtarin e delegacionit Lukas Savickas.
Takimi u përqendrua në procesin e anëtarësimit të Kosovës në Këshillin e Evropës dhe rëndësinë që ka kjo për qytetarët e saj, thuhet në njoftimin e ministrisë së Punëve të Jashtme dhe Diasporës.
Gjatë takimit u theksua se kalimi i aplikimit të Kosovës nga Komiteti i Ministrave tek Asambleja Parlamentare është i domosdoshëm, veçanërisht pas opinionit të Departamentit Ligjor të KE-së, i cili thekson se nuk ka asnjë pengesë ligjore që e pengon anëtarësimin e Kosovës në KE.
“Zëvendësministri Ahmeti, e falenderoi z.Zingeris dhe z.Lukas Savickas për mbështetjen e vazhdueshme të Lituanisë”, thuhet në njoftimin e MPJD-së, dërguar mediave.
