Përgatiti: Armand Hoti
Zotimet e dhëna në vitin e fundit të mandatit, kushtojnë mbi 60 milionë euro.
Kryetari i Komunës së Gjilanit, Alban Hyseni, tha se në mars potencialisht do të fillojnë punimet për ndërtimin e stadiumit të Gjilanit që financohet nga Ministria e Kulturës, Rinisë dhe Sportit, me vlerë prej 15 milionë eurosh.
“Në rastin ideal, më të mirë, dhe më të arsyeshëm ligjërisht, muaji mars do të nënkuptonte lidhjen e kontratës dhe fillimin e punimeve për ndërtimin e stadiumit të qytetit. Mbetet të shihet nëse prapë ndonjë operator do të bëjë ankesë dhe do ta vonojë procesin”, tha Hyseni.
Në listën e top-projekteve të Komunës, është edhe bulevardi i qytetit. Në kuadër të këtij projekti, parashihet edhe ndërtimi i parkingut nëntokësor.
Në total, sipas kryetarit, finalizimi i këtij projekti, do të ketë kosto prej rreth 20 milionë eurosh dhe do të financohet përmes një memorandumi bashkëpunimi.
“Ndërkohë, parkingu nëntokësor ka një të element të veçantë, që në rast të shfrytëzimit të tij prej rreth 40% të kapacitetit të plotë gjatë gjithë vitit, me pagesë për një orë, gjeneron rreth 2,1 milion euro në vit”, tha Hyseni.
Projekti i fundit që kryetari prezantoi, por jo edhe më i liri për nga kostoja është qarkorja e re e qytetit, që ka kosto prej rreth 27 milionë eurosh.
Ndërkaq, të dhënat e thesarit për periudhën janar-shtator të vitit të kaluar, tregojnë se komuna ka realizuar vetëm 35% të projekteve.
Deri në fund të vitit 2023, komuna ka shpenzuar mbi 75% të buxhetit.
Buxheti i Komunës së Gjilanit për vitin aktual është mbi 37 milionë euro.
