Përgatiti: Donisa Fazliu
Një ditë pas shpërthimit të zjarrit në Institutin e Mjekësisë Ligjore, Ministrja e Drejtësisë, Albulena Haxhiu, tha se sistemi elektrik dyshohet të ketë qenë shkaku.
“Ne na duhet t’i presim ekspertët të na tregojnë se cilat janë shkaqet, sipas informacioneve të para nga ata dhe ato i kemi siguruar dje në orët e vona të mbrëmjes, ka pasur një defekt në sistemin elektrik, mirëpo ka diskutime për brenda vetë ekspertëve dhe stafit të mjekësisë ligjore që mund të jetë shkaku prej kohës që është ndërtuar ai objekt”, tha Haxhiu.
Ajo përmendi tre tenderë të cilët kishin dështuar për shkak të ankesave të operatorëve ekonomikë e që do të duhej të pajisnin këtë institucion me sisteme kundër zjarrit.
“Lënda është në OShP dhe nuk kemi mundur ta bëjmë asnjë lëvizje, sepse ju e dini që bëhet shkelje, bëjnë shkeje zyrtarët përgjegjës, të cilët nuk presin përfundimin pranë organit të OShP-së, ne kemi kërkuar që të marrim informacione edhe të tjera në raport me shumë procedura dhe çështje të tjera që ndërlidhen, tani për tani janë këto informacione që i kemi”, tha Haxhiu.
Zjarri që shpërtheu në IML, të martën, ishte i dyti në këtë institucion. Ndërkaq, Tenderi për “Servisim dhe mirëmbajtje të aparateve kundër zjarrit” fillimisht ishte hapur më 30 mars pas zjarrit të parë.
Ministria e Drejtësisë kishte nisur procedurat e tenderimit edhe në korrik të këtij viti, por për shkak të ankesave në Organin Shqyrtues të Prokurimit, ky tender është i pezulluar.
Duke e tejkaluar çdo afat ligjor, “Gjykata e Tenderëve” ende nuk ka marrë vendim përfundimtar lidhur me këtë lëndë, derisa ankesa nga operatori ekonomik ishte dorëzuar më 11 shtator.
“Si pasojë e procedurave të prokurimit, ne kemi mbetur peng i këtyre procedurave dhe asnjëherë nuk kemi arritur ta instalojmë një sistem siç duhet kundër zjarrit”, tha U.D. i drejtori i IML-së, Ditor Halili.
Instituti i Mjekësisë Ligjore është institucion që funksionon në kuadër të Ministrisë së Drejtësisë.
