Vdes ish-presidenti i Serbisë, ishte akuzuar për krime lufte në Kosovë

Ish-presidenti i Serbisë, Milan Milutinoviq, ka ndërruar jetë në moshën 81-vjeçare. Ai ishte president i Serbisë nga dhjetori 1997 deri në dhjetor 2002, shkruan Danas, transmeton Paparaci.

Krahas atij posti, ai ishte Sekretar për Arsimin dhe Shkencën e Serbisë, ambasador Jugosllav në Greqi dhe ministër i Punëve të Jashtme të Jugosllavisë.

Pas përfundimit të mandatit të tij presidencial në Serbi, në dhjetor 2002, ai u dorëzua në Tribunalin e Hagës, ku u akuzua për krime lufte gjatë luftës së fundit në Kosovë.

Ai u lirua më 26 shkurt 2009 dhe u shpall i pafajshëm për të gjitha akuzat. Milutinoviq ishte në proces gjyqësor në Hagë së bashkë me pesë persona të tjerë, të akuzuar për krime lufte gjatë shtypjes barbare serbe ndaj shqiptarëve në Kosovë në fund të viteve 1990.

Prokurorët e akuzonin atë për bashkëpunim me ish-presidentin e Jugosllavisë, Slobodan Miloshevq, për ta mbajtur Kosovën nën kontrollin serb duke larguar me forcë mijëra shqiptarë.