Kryeministri i Kosovës, Albin Kurti, ka zhvilluar një takim me presidenten e Bankës Evropiane për Rindërtim dhe Zhvillim (BERZH), Odile Renaud-Basso, në margjina të Samitit të Procesit të Berlinit.

Kurti ka bërë të ditur se në këtë takim kanë vazhduar diskutimet e nisura në prill në Londër, me fokus forcimin e bashkëpunimit dhe projektet infrastrukturore e ekonomike në Kosovë.

Sipas Kurtit, që nga anëtarësimi i Kosovës në BERZH në vitin 2012, kjo bankë ka ofruar rreth 967 milionë euro mbështetje financiare për 151 projekte në sektorin publik dhe privat.

Ai ka theksuar se në mandatin e ri synohet që partneritetet për investime të bazohen në prioritetet strategjike të Kosovës, përfshirë sigurinë energjetike dhe ujore, mbrojtjen, transportin e qëndrueshëm dhe infrastrukturën.

Kurti ka vlerësuar gjithashtu se BERZH-i mbetet një partner i rëndësishëm për Kosovën, edhe në rrugën e saj drejt integrimit evropian.