Tyson Fury ka bërë një deklaratë të bujshme lidhur me duelin e shumëpritur ndaj Anthony Joshuas, duke pretenduar se përballja mes dy yjeve britanikë është në rrezik të anulohet.
Vetëm të enjten u konfirmua zyrtarisht se Fury dhe Joshua do të përballen më 11 dhjetor në stadiumin “Principality” në Cardiff, në një prej dueleve më të mëdha të peshave të rënda.
Turki Alalshikh, një prej figurave kryesore të boksit në Arabinë Saudite, kishte bërë të ditur se të gjitha detajet për përballjen ishin finalizuar. Megjithatë, Fury tani ka ngritur dyshime serioze mbi zhvillimin e saj.
“Lajm i fundit: Anthony Joshua dhe Eddie Hearn po përpiqen të tërhiqen nga ndeshja”, deklaroi Fury.
Britaniku vazhdoi me akuza të drejtpërdrejta ndaj promotorit të Joshuas, Eddie Hearn.
“Ata thonë se nuk do të ndeshen më. Kjo ka të bëjë kryesisht me egon e Eddie Hearn. Ai po shpik gjëra të ndryshme dhe po kërcënon se nuk do të ndeshemi”, tha Fury.
I njohur për deklaratat e tij provokuese, Fury e rriti edhe më shumë tensionin duke iu drejtuar drejtpërdrejt rivalit të tij.
“Gypsy King po kthehet në Mbretërinë e Bashkuar për të të shkatërruar para të gjithë fansave të mi në Uells, ndërsa ti po gjen një milion justifikime”, u shpreh ai.
Fury shtoi se Turki Alalshikh tashmë mund të jetë duke shqyrtuar alternativa të tjera nëse dueli me Joshuan nuk realizohet.
“Turki Alalshikh po gjen alternativa të tjera, burra të vërtetë që janë gati të ndeshen sa hap e mbyll sytë. Shpresoj që jeni të lumtur”, përfundoi Fury.
Pavarësisht deklaratave të Furyt, deri më tani nuk ka një konfirmim zyrtar se përballja është anuluar. Dueli mes dy britanikëve mbetet i planifikuar për 11 dhjetor në Cardiff.
