Përgatiti: Armand Hoti
Menaxhmenti i “Telekomit” të Kosovës, dyshon në paanshmërinë e ekspertëve të caktuar nga shkalla e dytë e Gjykatës Komerciale, për të bërë ekspertizën financiare në kontestin me kompaninë “Dardafon”.
Në seancën e shqyrtimit gjyqësor për lëndën përmbarimore, përfaqësuesi ligjor i ndërmarrjes publike, kërkoi shkarkimin e ekspertëve financiarë.
“Kërkojmë shkarkimin e ekspertëve për shkak të anshmërisë së tyre në këtë proces… eksperti financiar, Bashkim Uka ka lidhje të ngushta familjare me Ilir Ibrahimin, i cili është bashkëshorti i vajzës së zotëriut Bashkim Uka. I njëjti është ortak në biznes me Blerim Devollin”, tha Durim Ahmetaj nga përfaqësues ligjor i “Telekomit”.
Eksperti financiar, Bashkim Uka, tha se lidhja e tij familjare me aksionarin e një biznesi ku ka hise edhe Blerim Devolli, nuk përbën konflikt interesi.
“Nuk është ortak siç po deklaron përfaqësuesi i debitorit dhe nuk ka të bëjë asgjë me “Dardafonin”, unë kam qenë i bindur se nuk ka konflikt interesi, sepse nuk ka lidhje të drejtpërdrejtë”, tha Uka.
Kërkesa e menaxhmentit të “Telekomit”, nuk u aprovua nga gjyqtari Dren Rugova.
Ndërkohë, përfaqësuesi ligjor i ndërmarrjes kërkoi nga gjykatësi i çështjes, që në ekspertizën financiare të përfshihen edhe numrat dhe shërbimet 3 dhe 4G, të cilat ishin shfrytëzuar nga “Dardafoni”, bazuar në një marrëveshje të vitit 2017.
Vlera e këtyre shërbimeve, sipas përfaqësuesve të ndërmarrjes është mbi 10 milionë euro.
“Kërkojmë nga gjykata që në këtë plotësim konkluzioni, për të mundur të vijmë deri te një pretendim i drejtë dhe i ligjshëm të përfshihet dhënia e 90 mijë numrave shtesë dhe shërbimet 3 dhe 4G, të hyrat financiare që ka gjeneru kreditori nga këto shërbime e cila nuk është kontestuese mes palëve”, tha Ahmetaj.
Gjykatësi i çështjes refuzoi që në detyrat e ekspertëve të përfshihet llogaritja e mbi 10 milionëshit.
Referuar vendimit të shkurtit të shkallës së parë të Gjykatës Komerciale, “Telekomi” i detyrohet “Dardafonit” edhe 5.7 milionë euro në emër të vendimit të arbitrazhit të viti 2016.
Llogaritë e ndërmarrjes publike janë të bllokuara që nga muaji shkurt, rrjedhimisht nuk mund të ekzekutohen as pagat e rreth 1800 punëtorëve.
Deri më tani nga llogaritë e ndërmarrjes janë tërhequr 2.1 milion euro.