Bazuar në të dhënat e Agjencisë së Statistikave të Kosovës (ASK), numri i lindjeve në Kosovë vazhdon të ketë rënie nga viti në vit.
Sipas sociologut Jeton Brajshori, janë dy faktorë kryesor në rënien e lindjeve në Kosovë, statusi ekonomik dhe fuqizimi i gruas.
Ai në emisionin A LIVE në ATV, përmendi se tani është rritur edhe kostoja e rritjes së fëmijëve.
“Te statusi socio-ekonimik, normalisht se duhet të flitet për papunësinë, duhet të flitet për planifikimin familjar. Kemi martesat e hershme. Sot e kemi edhe koston më të lartë të fëmijëve për t’i rritur. Po ashtu, sot edhe fëmijët të cilët lindin janë më të shëndetshëm dhe nuk janë si më herët të cilët kemi pasur mortalitet shumë të madh edhe gjatë lindjes, por edhe pas lindjes. Në këtë mënyrë është dashur që familjet të bëjnë planifikime tjera, të bëjnë fëmijë më shumë për shkak të mortalitetit që ka qenë në lindje. Mirëpo, sot fatmirësisht, me zbulimin e vaksinave të shumta, nuk kemi probleme të tilla, por është rritur kostoja e rritjes së fëmijëve. Kur flasim te papunësia, atëherë në qoftë se je i papunë, si mund të planifikosh familje”, tha Brajshori. /atvlive.tv
