Përgatiti: Armand Hoti
Sa ishin në grevë nuk shkoi. Por katër ditë pas përfundimit të grevës së minatorëve të Trepçës, ministrja Artane Rizvanolli raportoi para deputetëve të Komisionit për Ekonomi.
Nga raportimi i ministres u kuptua se Qeveria dhe Bordi aktual i ndërmarrjes janë duke punuar në realizimin e kërkesave të minatorëve.
“Mund t’ju njoftoj se 92% e pagave janë ekzekutuar sot kryesisht me subvencione nga Qeveria, kurse pjesa tjetër do ekzekutohet pas pranimit të mjeteve nga shitja e koncentratit… Shpallja është hartuar me kujdes dhe pritet që brenda kësaj jave të shpallet konkursi për emërimin e kryeshefit të ri të ndërmarrjes”, tha Rizvanolli.
Mirëpo, angazhimi i ministres Rizvanolli po vlerësohet i vonshëm nga deputeti i AAK-së, Pal Lekaj.
“Si ndihesh si ministre që me lejen tuaj i keni ngujuar minatorët për moskomunikim, mosvendim”, tha Lekaj.
“Nuk e kuptoj si për qëllime politike ditore, ju e bëni këtë në mënyrë të vazhdueshme”, tha Rizvanolli.
Ndërkohë, sipas Rizvanollit, 27 milionë euro të taksave të qytetarëve, nga koha e Qeverisë Kurti I, e deri më tash janë dhënë në formë subvencioni për ‘’Trepçën’’. Pjesa dërrmuese e tyre është shpenzuar për rrymë dhe paga.
“Sa i përket shumës së investime, 27 milionë thashë janë dhënë në katër vitet e fundit, katër milionë kanë qenë për investime kapitale, kurse pjesa tjetër kanë qenë për shpenzime operative siç e thashë”, tha Rizvanolli.
Kryetari i komisionit për Ekonomi kërkoi sqarime për 20 milionë eurot hua për ‘’Trepçën’’, të miratuara në parim nga Qeveria, që synohej të destinoheshin për investime kapitale.
Ministrja u shpreh se po punohet në përzgjedhjen e makinerive të duhura.
Rizvanolli foli edhe për shkarkimin e Bordit paraprak të ndërmarrjes, duke shtuar se kjo u bë për shkak të mungesës së strategjisë konkrete nga ky bord.
