Përgatiti: Armand Hoti
Ushtarët turq të këmbësorisë, të cilët u dislokuan në Kosovë me kërkesë të NATO-s, pas protestave të dhunshme në veri, kanë filluar të kthehen në atdheun e tyre.
Ministria e Mbrojtës e Turqisë vlerësoi se misioni i 500 trupave turq mbaroi me sukses.
“Njësia jonë e dislokuar, pas mbërritjes së saj në kazermën “Sulltan Murat”, në Kosovë, më 6 qershor 2023, ka dhënë një kontribut të rëndësishëm në garantimin e paqes në Kosovë, mes 10 qershorit dhe 31 gushtit, dhe ka përmbushur me sukses misionin e saj”, thuhet në njoftimin e Ministrisë së Mbrojtjes së Turqisë.
Në një përgjigje për ATV-në, KFOR-i thotë se ky veprim vjen në kuadër të një procedure normale të ndërrimit të kontingjenteve.
“Ndërrimi i kontingjenteve lidhet me procedurën normale të pranim-dorëzimit”, thuhet në përgjigjen e KFOR-it.
Eksperti i sigurisë, Avni Islami, vlerëson se largimi i ushtarëve turq nga Kosova, mes tjerash është rezultat i mirë-menaxhimit të situatës nga institucionet e sigurisë së Kosovës.
“Kjo flet qartë se situata në veriun e Kosovës është shpërshkallëzuar me vetë faktin kjo flet më shumë se kaq. Kjo tregon se deri më tani institucionet e sigurisë së Kosovës po e menaxhojnë situatën në mënyrë perfekte”, tha Islami.
Në anën tjetër, Sergjan Simonoviç, nga shoqëria civile në Mitrovicë të Veriut, beson se gjendja e sigurisë në veri vazhdon të mos jetë e kënaqshme.
“Nuk do të thosha se situata e sigurisë është e përsosur në veri, për shkak se nuk kemi mjaftueshëm pjesëtarë të policisë, që mirëpriten nga qytetarët. Çfarë kemi këtu janë forcat speciale, të cilat nga qytetarët shihen si kërcënim. Gjëja e parë që na duhet është që dikush nga komuniteti të shërbejë në forcën e policisë, në mënyrë që të ketë ndjenjë të sigurisë në mesin e qytetarëve”, tha Simonoviç.
Madje, ai kërkon që të ketë prezencë më të shtuar të autoriteteve ndërkombëtare në veri.
“Edhe KFOR-i mund të jetë pjesë e kësaj, por mendoj se angazhimi i EULEX-it, apo veçanërisht UNMIK-ut, nuk shohim aktivitete apo përpjekje të këtyre organizatave për deeskalim, në përjashtim të disa takimeve që mbajnë me ne, sektori civil.”
Trupat e KFOR-it turk, pas protestës së dhunshme ku mbetën të lënduar 30 pjesëtarë të misionit të NATO-s në Kosovë, ishin vendosur përreth objektit komunal në Zveçan. Ndërkaq, së fundmi para këtij objekti, po qëndron KFOR-i letonez.
