Fenerbahçe kërkon ndëshkime pas kaosit në ndeshjen ndaj Galatasarayt

Fenerbahçe ka reaguar ashpër pas incidenteve të raportuara në derbin ndaj Galatasarayt, duke kërkuar hetim të plotë të ngjarjeve dhe ndëshkimin e të gjithë personave që mund të kenë qenë të përfshirë në sulmet e pretenduara ndaj futbollistëve të saj.

Në një komunikatë zyrtare, klubi nga Stambolli ka paraqitur versionin e tij për ngjarjet, duke pretenduar se tensionet nisën pas fyerjeve në drejtim të Kerem Akturkoglut dhe më pas përshkallëzuan në përplasje fizike.

Sipas Fenerbahçes, mesfushori Matteo Guendouzi është sulmuar nga Serhat Dogan, pjesë e ekipit të analizës së Galatasarayt. Klubi pretendon gjithashtu se në incident është përfshirë edhe Abdulkerim Bardakci, i cili dyshohet se ia ka tërhequr flokët futbollistit të Fenerbahçes.

Drejtuesit e klubit i kanë dënuar këto veprime, duke theksuar se rivaliteti mes dy skuadrave dhe tensionet që shoqërojnë një derbi nuk mund të shërbejnë si justifikim për dhunën ndaj futbollistëve.

“Rivaliteti dhe tensioni i një derbi nuk i japin askujt të drejtën të sulmojë futbollistët tanë. Ajo që ndodhi nuk mund të justifikohet me ‘tensionin e derbit’”, thuhet në reagimin e klubit.

Fenerbahçe kërkon që incidentet të shqyrtohen në mënyrë të gjithanshme dhe që personat përgjegjës të përballen me masa disiplinore, pavarësisht pozitës apo rolit të tyre.

“Rruga për ta parandaluar dhunën në futbollin turk është që përgjegjësit të mos mbeten pa u ndëshkuar”, përfundon komunikata.

Pas këtyre pretendimeve, mbetet të shihet nëse organet përkatëse do të nisin procedurat për zbardhjen e plotë të ngjarjeve dhe nëse do të shqiptohen masa disiplinore ndaj personave të përmendur.