Përgatiti: Arian Hajdaraj
Stabiliteti në Qeverisje me Lëvizjen Vetëvendosje që gëzon shumicën në Kuvend, nuk ka ndikuar që të ketë përmirësime të dukshme në funksionimin e brendshëm të shtetit, sipas Freedom House.
Kështu në fakt nis raporti i organizatës, i cili bazuar në ngjarjet vitit 2023, shtetin e konsideron pjesërisht të lirë me poentim 3.29 nga 7 sa është maksimumi.
Ky vlerësim sipas shpjegimit në raport, nënkupton që institucionet demokratike janë të brishta dhe ekzistojnë sfida thelbësore për mbrojtjen e të drejtave politike dhe lirive civile.
Duke e konsideruar vit të vështirë, në mënyrë kronologjike janë përmendur zhvillimet kryesore, nisur nga takimet në dialogun Kosovë – Serbi, sulmi në Banjskë dhe bojkoti i zgjedhjeve në veri.
Te paragrafët për korrupsionin, ndër të tjera, Freedom House ka përmendur shkarkimin e një zyrtari të policisë për shkak të hetimeve ndaj Martin Berishajt e Nagip Krasniqit.
“Në korrik, shefi i Njësisë së Hetimeve Speciale të Policisë së Kosovës, Shemsi Haziri, ishte shkarkuar nga pozita e tij, përmes një njoftimi verbal pa arsyetim të detajuar për vendimin. Haziri ishte i njohur për udhëheqjen e hetimeve kundër ambasadorit të Kosovës në Kroaci, Martin Berishaj, dhe kundër ish-shefit ekzekutiv të KEK-ut, Nagip Krasniqi, të dy të lidhur me Vetëvendosjen. Ky vendim për shkarkimin e kreut të hetimeve të rëndësishme të korrupsionit u konsiderua si shkak për shqetësim, duke dërguar një sinjal negativ në opinion për angazhimin e Kosovës në luftimin e korrupsionit”, thuhet në raport.
Më së shumti është vlerësuar zhvillimi në shoqërinë civile, me gjithsej 4.75, duke përmendur protestat dhe reagimet posaçërisht pas dënimit ndaj të akuzuarve për vrasjen e Marigona Osmanit.
Me 3.75 është poentuar qeverisja demokratike vendore, duke u përmendur qëndrimi i Lulzim Hetemit brenda komunës për muaj të tërë, ndryshimi i ligjit për tatimin në pronë dhe fillimi i faturimit të energjisë elektrike në komunat veriore të banuara me shumicë serbe.
Duke i përmendur 64 sulmet fizike ndaj gazetarëve, gjysma prej të cilave të ndodhura gjatë raportimit në veri, pavarësia e mediave është vlerësuar me 3.25.
Në fakt, i gjithë poentimi i vitit 2023 përfshirë edhe ata në paragrafët specifikë, është komplet i ngjashëm me atë të vitit 2022.
