Përgatiti: Benita Zeneli
Drejtori i zyrës për Kosovën në Qeverinë e Serbisë, Petar Petkoviq, është takuar në Rashkë me përfaqësuesit politikë të këtij komuniteti. Bashkë, ata kërkuan zgjidhje se si t’u mundësohet serbëve të Kosovës të votojnë në zgjedhjet parlamentare të Serbisë, të cilat do të mbahen më 17 dhjetor.
Ky mes tjerash ishte takimi i parë i Petkoviqit me strukturën e re udhëheqëse të Listës Serbe. Mediat nuk ishin lejuar ta xhirojnë këtë takim e nga fotografitë e publikuara nuk shihej se i pranishëm ishte Goran Rakiq, deri vonë kryetar i Listës Serbe e tashmë kandidat i Partisë Përparimtare Serbe për deputet.
Sipas një njoftimi të lëshuar nga Qeveria e Serbisë, serbët nga Kosova kërkuan të votojnë. Por, zgjedhjet parlamentare të Serbisë më 17 dhjetor nuk do të mund të organizohen. Të paktën nëse Serbia e Kosova nuk arrijnë marrëveshje të posaçme ndërshtetërore, siç kërkoi ditë më parë kryeministri Albin Kurti.
Kushtet e Kurtit shteti serb tashmë i vlerësoi si absurde. Andaj Beogradi e ka menduar një zgjidhje, të cilën e ka praktikuar edhe në të shkuarën.
“Diktatori Vuçiq po mendon të marrë 20 mijë vota. Kështu mendohet që do të organizojnë përmes autobusëve që serbët e Kosovës të udhëtojnë drejt Serbisë për të votuar”, tha Branislav Krstiq, analist.
Zgjedhjet e fundit të organizuara në Serbi ishin ato presidenciale në prill të vitit 2022 e të cilat për herë të parë nuk janë organizuar në territorin e Kosovës.