Përgatiti: Sara Shehu
Punëtorët teknikë të Qendrës Kryesore të Mjekësisë Familjare në Prishtinë kanë protestuar para objektit ku punojnë në shenjë pakënaqësie me pagat e ulëta.
Aktualisht punëtorët teknikë paguhen prej 230 deri në 250 euro varësisht nga pozita, por nuk është vetëm paga e ulët halli i vetëm i tyre. Ata ankohen se në këtë qendër nuk kanë as kushtet elementare për punë.
“Me paga jemi tejet të diskriminuar, jemi të pshtetur për muri. Kushtet infrastrukturore brenda qendrës janë të dobëta. Na duhet me pastru xhama por s’ka as shkallë. Domethënë higjiena duhet të jetë në nivel e knej s’ka kushte”, tha Emine Sahiti, punëtore në sektorin e higjienës .
“Na s’paguhmi as për festa e as në kujdestari. E knej higjienën e dojn po s’ka as kushte këtu janë tmerr”, tha Kumrije Shabani, punëtore në sektorin e higjienës.
Në anën tjetër Kryetari i Sindikatës së Pavarur të Sektorit Privat, Jusuf Azemi, tha se QKMF-ja u ka kërkuar punëtorëve të nënshkruajnë kontratë me vlerë 303 euro pagë neto por, kjo është refuzuar.
Azemi tha se punëtorët teknik duan rritje të pagës në 450 euro neto.
“Ne si sindikatë por sigurisht edhe punëtorët kanë kërkuar që të mos pranohet kjo pagë. Ne sigurisht nuk do bëjmë greva dhe protesta tjera pasi kemi ardhur deri te një vendim përfundimtar, në mënyrë unanime pasi të nënshkruhen kontratat do të lëshojmë të gjitha vendet e punës dhe QKMF-ja do të mbetet pa përkujdesje. Jemi takuar dhe nuk jemi dakorduar që paga e këtyre punëtorëve të mos jetë 275 euro, jo se dojmë të kryejmë komoditet por megjithatë nuk mund të ja dalim andaj ne i preferojmë kryetarit të Prishtinës që të sigurojë punëtorë të Bangladeshit sepse ne ma nuk punojmë”, tha Azemi.
Mbështetës i kërkesave të tyre, është edhe Kryetari i Shoqatës Sindikale të QKMF-së, Sherif Makolli.
“Fuqimisht i mbështes këta punëtorë. Dhe e them se janë kategoria e punëtorëve më të diskriminuar..”, tha Makolli.
Nga ana tjetër, edhe drejtori i QKMF-së në Prishtinë, Bujar Gashi, dha një sqarim për situatën në fjalë.
“Janë punëtorë të kontraktuar nga një kompani private që ka marrëveshje me komunën e Prishtinës. Nuk i ndajmë prej punëtorëve tonë, pavarësisht që janë punëtorë të një kompanie private që ka marrëveshje me komunën. Sa i përket kushteve të punës, në këto kushte të njëjta janë duke punuar të gjithë punëtorët e institucioneve shëndetësore. Këto kushte janë që janë, por kemi bërë edhe renovime”, tha Gashi.
Dhjetëra punëtorë teknikë të Kujdesit Parësor Shëndetësor në Prishtinë ndërvite kërkojnë rritje page gjë e cila deri më sot ende nuk është përmbushur.
