Gara për titullin në Liga Premier po hyn në fazën vendimtare, ndërsa Arsenal mbetet favorit për t’u shpallur kampion.
Skuadra e drejtuar nga Mikel Arteta kryeson tabelën me dy pikë më shumë se Manchester City dhe ka gjithçka në dorën e saj. Arsenalit i nevojiten dy fitore në dy javët e fundit për të siguruar titullin kampion.
“Topçinjtë” fillimisht do të përballen me Burnley më 18 maj, ndërsa më pas do të luajnë ndaj Crystal Palace më 24 maj. Burnley tashmë ka rënë nga kategoria, ndërsa Crystal Palace nuk ka objektiva konkrete në fundin e sezonit, faktorë që teorikisht favorizojnë Arsenalin.
Megjithatë, trajneri i Manchester Cityt, Pep Guardiola, besohet se shpreson te një reagim i fortë i Burnleyt. Skuadra në fjalë së fundmi arriti të ndalë Cityn dhe mori një barazim 2-2 ndaj Aston Villa, pavarësisht se nuk kishte më objektiva sezonale.
Sipas mediave angleze, Guardiola thuhet se ka premtuar nga një orë luksoze Rolex për lojtarët e Burnleyt nëse arrijnë të ndalin Arsenalin dhe t’i japin një ndihmë Cityt në garën për titull.
Raportimet kanë shkaktuar reagime të shumta në opinionin sportiv. Disa e konsiderojnë lajmin si një ekzagjerim mediatik, ndërsa të tjerë besojnë se Guardiola njihet për përdorimin e metodave psikologjike për të ushtruar presion ose motivim shtesë në momentet më të rëndësishme të sezonit.
