Pas triumfit në FA Cup ndaj Chelseat, Pep Guardiola ka kthyer menjëherë fokusin te gara për titullin e Ligës Premier, ku Manchester City vazhdon ta ndjekë Arsenalin deri në javët e fundit të sezonit.
City ndodhet dy pikë prapa Arsenalit me vetëm dy ndeshje të mbetura, ndërsa përballja e së martës ndaj Bournemouthit konsiderohet vendimtare në garën për titull.
“Do të përpiqemi ta zgjasim sezonin. Do të përpiqemi ta fitojmë ndeshjen dhe të mbërrijmë kundër Aston Villës me një shans. Me letrat në tavolinë, ne e dimë saktësisht çfarë duhet të bëjmë”, deklaroi Guardiola.
Trajneri spanjoll vlerësoi maksimalisht Bournemouthin, skuadër që po lufton për një vend në garat evropiane.
“Ata po luajnë për Evropën dhe nuk e di herën e fundit kur kanë humbur. Është një ekip i jashtëzakonshëm. Mënyra si bëjnë presion është ndoshta më energjikja në Ligën Premier”, shtoi ai.
Bournemouth aktualisht ndodhet në vendin e gjashtë dhe i mjafton vetëm një pikë në dy ndeshjet e fundit për ta siguruar pjesëmarrjen historike në garat evropiane.
Guardiola foli edhe për lodhjen e skuadrës pas finales së FA Cup në Wembley, por theksoi se fitorja ndaj Chelseat ka ndikuar pozitivisht te ekipi.
“Lodhja do të jetë e njëjtë, por energjia do të jetë ndryshe. Të shkoje në Bournemouth pas një humbjeje ndaj Chelseat do të ishte shumë më e vështirë”, u shpreh ai.
Gara për titull mund të vendoset vetëm në javën e fundit, pasi diferenca në golavarazh është minimale. Manchester City ka +43, vetëm një gol më shumë se Arsenali që ka +42.
