Pas paralajmërimeve nga Parisi e Londra për njohjen e një shteti të pavarur palestinez në shtator, një gjë të tillë ka thënë se do ta bëjë edhe Malta në Asamblenë e Përgjithshme të Kombeve të Bashkuara po atë muaj.
Njoftimin për këtë vendim e dha të martën në mbrëmje kryeministri i shtetit të vogël ishullor, Robert Abela, raporton agjencia e lajmeve “Reuters”.
“Pozicioni ynë e pasqyron përkushtimin tonë ndaj përpjekjeve për një paqe të qëndrueshme në Lindjen e Mesme” – shkroi Abela në rrjetin social “Facebook”.
Qeveria e Maltës ka qenë nën presion të shtuar brenda rangjeve të veta për të njohur një shtet palestinez dhe opozita e qendrës së djathtë këtë muaj gjithashtu bëri thirrje për njohje të menjëhershme.
Shteti mesdhetar, anëtar i Bashkimit Evropian, ka një histori të përkrahjes për kauzat palestineze dhe i ka mbështetur përpjekjet për një zgjidhje me dy shtete.
Abela fillimisht i kishte bërë të ditura planet për njohjen e një shteti palestinez në maj, duke thënë se veprimi do të bëhej në një konferencë të Kombeve të Bashkuara në qershor, por konferenca më vonë ishte shtyrë.
Irlanda, Norvegjia dhe Spanja e njohën Palestinën si shtet të pavarur në maj.
Paralajmërimet e Britanisë dhe Francës për njohjen e Palestinës kanë shkaktuar reagime negative nga Izraeli dhe Shtetet e Bashkuara. Presidenti amerikan, Donald Trump, ka thënë se vendi i tij nuk planifikon që ta ndjekë shembullin e Londrës.
