Përgatiti: Kastriot Tahiri
Pesë anëtarët e opozitës, pjesë e Komisionit parlamentar për subvencionimin e teksteve dhe mjeteve shkollore, dorëzuan kallëzim penal ndaj Ministres së Arsimit Arbërie Nagavci.
Në Prokurorinë Speciale ata paraqitën edhe raportin e ekspertëve, i cili thonë se dëshmon shkeljet procedurale e ligjore të ministres.
“Ky proces është përmbyllur me një raport final, i cili ka mjaft gjetje të shkeljes procedurale, shkeljeve ligjore dhe ka bazë për hetim të mëtejmë nga Prokuroria lidhur me përgjegjësinë e individëve që janë marrë me këtë proces”, tha Shemsedin Dreshaj, kryetar i komisionit.
“Ka shkelje ligjore dhe ka tejkalime të buxhetit, ka shpenzime më të mëdha se sa me metodë tjetër të furnizimit të nxënësve me tekste”, tha deputeti i LDK-së, Agim Veliu.
Përveç Nagavcit, sipas PDK-së, sqarime duhet dhënë edhe Ministri i Financave dhe kryeministri.
“Nga 4 milionë të planifikuara ata i kanë harxhuar 11 milionë në vitin e kaluar. Përveç kësaj, nxënësit nga klasa 6-9 nuk i kanë marrë fare librat. Nagavci si udhëheqëse e këtij procesi, Murati si përgjegjës që i kanë shpenzimet financiare dhe Kurti si shef i këtyre të parëve duhet të rrëfehen te prokuroria speciale”, tha deputeti i PDK-së, Ardian Kastrati.
Ndërsa, akuzave të Vetëvendosjes se raporti i ekspertëve u përpilua në zyrat e PDK-së iu përgjigj, Bekim Haxhiu.
“LV-ja duhet të thotë diçka, edhe me rrejtë diçka. Procesin e përzgjedhjes së ekspertëve e ka përzgjedhur Armend Muja. Kur e kanë parë raportin me Normalisht se diçka duhet të thonë ata. Mirëpo, unë besoj plotësisht se ekspertët as nuk e dinë ku janë zyrat e PDK-së, e as nuk i kemi përzgjedhur ne”, tha Haxhiu.
Sipas raportit të dalë nga puna e Komisionit Parlamentar për procesin e subvencionimit të blerjes së teksteve shkollore, thuhet se u keqpërdorën 6.3 milionë euro, të cilën gjë ministrja e mohon.
