Një sipërmarrës nga Massachusetts ka folur për fundin e martesës së tij me Kristin Cabot, e cila këtë verë u pa në krahët e shefit të saj, Andy Byron, gjatë një koncerti të “Coldplay”.
Pamjet nga “Kiss Cam”, ku Kristin dhe Byron u përpoqën të fshiheshin, bënë menjëherë xhiron e rrjetit dhe u shoqëruan me shakatë e këngëtarit Chris Martin, i cili tha: “Ose janë në një lidhje të fshehtë, ose kanë shumë turp”.
Vetëm pak javë më vonë, Kristin paraqiti kërkesë për divorc në New Hampshire.
Një zëdhënëse e bashkëshortit të saj, Andrew Cabot, theksoi se çifti ishte ndarë privatisht dhe në mënyrë miqësore përpara koncertit.
“Vendimi për divorc ishte marrë tashmë. Tani Andrew shpreson që kjo të mbyllë spekulimet dhe t’i japë familjes privatësinë që e ka vlerësuar gjithmonë”.
Andrew, 61 vjeç, është CEO i ‘Privateer Rum’ dhe ka dy fëmijë nga një martesë e mëparshme.
Me Kristin ai nuk ka fëmijë.
Skandali me Byron, i cili është gjithashtu i martuar, ndezi një valë memesh dhe diskutimesh online, duke ngritur edhe pyetje mbi kufijtë e privatësisë në epokën digjitale.
Si Kristin, ashtu edhe Byron, u larguan nga kompania Astronomer, ku punonin bashkë.
Në një reagim pas largimit të tyre, CEO i përkohshëm Pete DeJoy tha se kompania tregoi qëndresë përballë kësaj vëmendjeje të pazakontë mediatike.
“Edhe pse nuk do të doja të ndodhte në këtë mënyrë, Astronomer tani është bërë një emër i njohur”. /Telegrafi/
