Përgatiti: Kastriot Tahiri
Shpjegimet që po i dëgjojnë nga mësimdhënësi janë ndryshe nga të zakonshmet. Për këtë ligjëratë, libra e fletore i larguan nga bankat, por sy e vesh i patën nga mësimdhënësit.
Nxënësit e shkollës fillore “Emin Duraku” në Prishtinë, po dëgjojnë ligjëratën sensibilizuese kundër dhunës me bazë gjinore, nga e cila thanë se kuptuan shumë gjëra.
“Kemi mësuar që dhuna nuk është zgjidhje për konfliktet e mundshme, sepse mund të çojë deri te vrasja. Nëse kemi dhunë të vazhdueshme duhet të raportojmë atë në shkollë te mësuesit, te prindërit ose te policia”, tha Morea Krasniqi, nxënëse.
Tema e njëjtë u trajtua në të gjitha shkollat e komunës së Prishtinës.
“Nuk ka arsye në botë që duhet me e ekzistu që dikush e ka të drejtën me ia marrë jetën dikujt tjetër, jo vetëm që janë vra gratë, por edhe fëmijët kanë mbetur pa nënë. Për këtë është tepër mirë që edhe në shkolla me pasë dialog dhe me diskutu që fenomeneve të tilla me iu shpallë luftë një herë e përgjithmonë, mos me pranu si prezente. Vrasja vjen edhe si konsekuencë e dhunës së përhershme në familje. Prandaj, para se me ndodhë vrasja duhet gjithmonë dhunës m’i shpallë luftë, edhe mos me pranu që në familjet tona me pasë dhunë ndaj asnjë anëtari të familjes”, tha Jehona Lushaku nga DKA Prishtinë.
Me po kaq rëndësi të madhe ligjëratën po e sheh edhe njohësi i arsimit, Rinor Qehaja. Ai thotë se ligjëratat e tilla të futen në plan-programet shkollore.
“Na nevojitet në mënyrë të centralizuar të ofrohet planprogrami mësimor për parandalimin e dhunës në familje dhe ndaj gruas. Ka shumë opsione, ato duhet të kthehen në mënyrë të prekshme për nxënësit, është një lëndë me zgjedhje me një fond të orëve të mjaftueshme që me rritë vetëdijen për këto mosha”, tha Qehaja.
Qehaja thotë se as librat aktualë me të cilat mësohet kundër dhunës nuk ofrojnë material të mjaftueshëm për parandalimin e saj.
Vendimi i komunës së Prishtinës, që në orën e parë në të gjitha shkollat në kryeqytet të mbahet ligjërata sensibilizuese kundër dhunës me bazë gjinore, vjen pas vrasjes së dy grave brenda pak ditësh në Ferizaj dhe në Pejë.
Më shumë detaje i gjeni në Edicionin Qendror të lajmeve në videon më poshtë:
