Ndihmës-sekretari i NATO-s sot në Kosovë, diskutohet për hapjen e Urës mbi lumin Ibër

Kryeministri i Kosovës, Albin Kurti të mërkurën bëri të ditur se të enjten për vizitë në Kosovë do të jetë ndihmës-sekretari i përgjithshëm për operacione i NATO-s, Thomas Goffus.

I pari i Qeverisë Albin Kurti, e tha këtë në mbledhjen e Qeverisë.

Kurti, tha se temë diskutimi do të jetë edhe çështja e hapjes së urës së Ibrit.

“Të enjten për vizitë vjen Thomas Goffus, Ndihmës Sekretari i Përgjithshëm për Operacione i NATO-s…dërkaq javën e ardhshme do t’i mirëpresim dy ministra të jashtëm të dy shteteve anëtare të NATO-s. Në të gjitha këto takime natyrisht diskutohet edhe çështja e hapjes së urës qendrore mbi lumin Ibër në Mitrovicë, për të cilën jemi duke i bërë të gjitha konsultimet e nevojshme, si dhe punët tona të shtëpisë, si për shembull trajtimi i draftit preliminar për qëndrueshmërinë fizike të urës, teksa presim raportin final, e deri te përgatitjet për rregullimin e pamjes dhe pastrimin e mjedisit rrotull”, tha kryeministri Kurti të mërkurën.