Përgatiti: Sara Shehu
Departamenti i vaksinimit në Qendrën e Mjekësisë Familjare në Greme të Ferizajt, të hënën, për rreth dy orë, ka qenë i zbrazët.
Për shkak të mosofrimit të shërbimeve, banorët e këtij fshati janë detyruar që vaksinën kundër gripit sezonal, ta marrin në Qendrën kryesore të mjekësisë familjare në Ferizaj.
“Jam shku me marr vaksinën po asnjeri s’u kanë në vendin e punës, po largohen e po ikin e na me i pritë aty, po duhet s’disa edhe i vjetër s’po muj kështuqë e kom lan me marr këtu n’qendrën kryesore”, tha Musli Murseli, qytetar.
“Në përgjithësi, nëpër shtëpi të shëndetit po bojnë manipulime, nuk po rrinë nëpër vende të punës. Stafi i vaksinimit del se s’po kanë interesim me nejt. Oshtë gjynah që po na bojnë kësi gjërash, ne të moshuarit duhet të kujdesemi nga ata, ka raste të tilla, jam duke ba plan apet me marr këtë vit vaksinën, me gru amo me gjasa që s’i gjejmë as kësaj here mjekët aty”, tha Ejup Cakolli, qytetar.
Mirëpo, ankesat e pacientëve po i mohon shefja e Vaksinimit në këtë komunë, Drita Nazifi-Emini. Sipas saj, secila njësi e vaksinimit është në gatishmëri për procesin e vaksinimit.
“Deri më sot janë vaksinuar më shumë se 3000 qytetarë në qendrat e mjekësisë. Ne kemi mbështetjen e komunës për punëtorë dhe mund të themi se jemi të trajnuar që në secilën qendër të jetë stafi mjekësor për pacientët, të cilët janë gjithmonë aty për ofrimin e vaksinës për të interesuarit. Tani interesimi ditëve në vazhdim pritet të rritet edhe më shumë”, tha Nazifi-Emini.
Tutje, ajo ka bërë të ditur se në 7 Qendrat e Mjekësisë Familjare punojnë nga 3 infermiere për ofrimin e vaksinës për pacientët.
Ndryshe, procesi i vaksinimit kundër gripit sezonal ka filluar në fillim të muajit tetor, me ç’rast Ministria e Shëndetësisë ka siguruar mbi 85 mijë vaksina.
Më shumë detaje i gjeni në Edicionin Qendror të lajmeve në ATV, në videon më poshtë:
