Drejtoresha e KRU “Prishtina”, Arjeta Mjeku, në një lidhje të drejtpërdrejt në emisionin A LIVE, tha se vlerat e manganit në liqenin e Badocit janë duke rënë dukshëm dhe shpreson se që nga java e ardhshme, uji do të jetë i gatshëm për pije dhe gatim.
“Cilësia e ujit ka filluar të përmirësohet, jo ndoshta 100 për qind, mirëpo këto vlera variojnë, sepse ndoshta ndonjëherë në mbrëmje, nëse marrin mostra, del që niveli i manganit ka rënë dukshëm, mirëpo në mëngjes prapë rritet, kështu që ne po presim pasi që ka rënie të vlerave të nivelit të manganit në liqen, po presim dhe po shpresojmë që nga java e ardhshme qytetarët që furnizohen nga sistemi i furnizimit me ujë nga impianti i trajtimit të ujit në Badoc, do të mund të pinë ujë për pije dhe ta të përgatisin ushqim”, tha Mjeku.
Ajo shtoi për këtë janë në kontakte vë vazhdueshme me IKSHPK-në, ndërsa deri në njoftimin e radhës, do të vazhdojnë të shpërndajnë ujë të pijshëm përmes autobotëve për qytetarët që janë me kushte të rënda ekonomike.
Mjeku, gjithashtu njoftoi se së bashku me IKSHPK-në janë duke monitoruar cilësinë e ujit në liqenin e Badocit, ku edhe po bëjnë shpëlarjen e rezervuarëve që i kanë të vendosura në zonat urbane dhe rurale.
“Kompania Rajonale e Ujësjellësit “Prishtina”, bashkë me Institutin e Shëndetit Publik të Kosovës, në vazhdimësi janë duke monitoruar cilësinë e ujit pijshëm, jo vetëm në ujin e trajtuar, por edhe në ujin e patrajtuar, pra direkt në Liqenin e Badocit dhe njëkohësisht po merr mostra edhe në linjat magjistrale dhe sekondare. Në mënyrë që cilësia e ujit të përmirësohet, ne kemi rekomandim nga Instituti i Shëndetit Publik të Kosovës që të merremi me shpëlarjen apo dezinfektimin e rezervuarëve që i kemi të vendosur në zonat urbane dhe rurale, po ashtu edhe me shpëlarjen e tubacioneve apo linjave magjistrale dhe sekondare”, tha Mjeku. /atvlive.tv
Më shumë detaje i gjeni në videon më poshtë:
