Përgatiti: Kastriot Tahiri
Krejt këto të shtëna u bënë në drejtim të policisë, në mëngjesin e së premtes.
Persona të panjohur cak patën grabitjen e bankomateve në njërën nga pikat e karburanteve, në qytetin e Ferizajt.
Mirëpo, i gjithë plani u dështoi, pasi që policia arriti t’i parandalojë ata.
Zëdhënësi i policisë rajonale të Ferizajt, Kanun Veseli, tha se të shtënat me armë zjarri filluan sapo të dyshuarit kishin parë patrullën e policisë.
“Sot, rreth orës 04:50, kemi pranuar një informatë se në rrugën magjistrale Ferizaj-Prishtinë, te pika e karburantit “Hib Petrol” në Ferizaj, ishte një grabitje e armatosur në proces nga persona të panjohur. Patrulla e Policisë me të arritur në vendin e ngjarjes, të dyshuarit kanë filluar të shtien me armë zjarri në drejtim të veturës së policisë, duke dëmtuar në masë të madhe veturën zyrtare, mirëpo dy policët që ishin në veturë nuk kanë pësuar ndonjë lëndim”, tha Veseli.
Por, të dyshuarit nuk arritën t’i arrestojnë. Ata u larguan nga vendi i ngjarjes kur edhe policia nisi t’iu përgjigjet të të dyshuarve me shkëmbim zjarri.
“Shkëmbim zjarri kishte edhe nga ana e zyrtarëve policorë, mirëpo të dyshuarit kanë arritur të largohen nga vendi i ngjarjes, me një veturë dyshohet karavan ngjyrë teget, në drejtim të panjohur dhe në veturë dyshohet se ishin 4 persona me armë të gjata”, tha Veseli.
Rasti është cilësuar si, “Tentim vrasje, “Shkaktim i rrezikut të përgjithshëm” dhe “grabitje e armatosur”.
Ndërkaq, prokuroria themelore në Ferizaj, përmes telefonit i thanë ATV-së, se me këtë rast janë duke u marrë të gjitha njësitet hetimore, që sa më parë të zbardhet rasti.
