Komisioni Qendror i Zgjedhjeve ka njoftuar se është përmbyllur procesi i verifikimit dhe numërimit të votave në 21 Qendra Komunale të Numërimit (QKN).
Sipas zëdhënësit të KQZ-së, Valmir Elezi, deri në orën 21:30 të mbrëmjes së djeshme, ky proces është finalizuar në komunat Hani i Elezit, Junik, Mamushë, Zveçan, Mitrovicë e Veriut, Zubin Potok, Deçan, Shtime, Klinë, Shtërpcë, Obiliq, Istog, Skenderaj, Viti, Rahovec, Suharekë, Dragash, Kaçanik, Lipjan, Fushë Kosovë dhe Ferizaj.
Elezi ka sqaruar se në Qendrat Komunale të Numërimit zhvillohen tri procese të rëndësishme: verifikimi i rezultateve për kryetarë komunash, verifikimi i rezultateve të subjekteve politike për kuvendet komunale, si dhe numërimi i votave të kandidatëve për anëtarë të kuvendeve komunale.
Ndërkohë, në platformën zyrtare të KQZ-së po publikohen në mënyrë të vazhdueshme rezultatet nga çdo vendvotim, teksa procesi i përmbylljes së numërimit në komunat e mbetura pritet të përfundojë së shpejti.
