Italia dhe Shqipëria zhvillojnë sot në Romë një samit të përbashkët ndërqeveritar, që pritet të shënojë një hap të ri në marrëdhëniet strategjike mes dy vendeve. Pala italiane ka theksuar se ky samit synon të ndërtojë një bashkëpunim më të strukturuar dhe afatgjatë me Tiranën, duke planifikuar një qasje më të gjerë dhe më strategjike në raportet dypalëshe.
Marrëveshja kryesore që pritet të nënshkruhet është konceptuar për të krijuar një kuadër të qëndrueshëm dhe të rregullt bashkëpunimi, që përfshin fusha të gjera: nga ekonomia dhe infrastruktura, te mbrojtja, siguria, energjia dhe mjedisi, deri te inovacioni, shëndetësia dhe trajnimi profesional.
Një vëmendje e veçantë do t’i kushtohet rolit të përbashkët që Italia dhe Shqipëria po marrin në rajon — si një qendër kyçe për lidhjen e energjisë dhe infrastrukturës me Evropën. Ndër projektet prioritare që do të diskutohen është Korridori VIII Evropian, i cili do të lidhë Detin Adriatik me Detin e Zi, duke e bërë Shqipërinë një nyje të rëndësishme në rrjetin energjetik dhe transportues të kontinentit.
Sipas mediave italiane, marrëveshjet teknike që do të firmosen do të fokusohen në rritjen e bashkëpunimit në fushat e mbrojtjes, energjisë dhe shëndetësisë, si dhe në ndërtimin e kapaciteteve për mbrojtjen civile, mbështetjen e bizneseve të vogla dhe të mesme, luftën kundër trafikut të drogës dhe bashkëpunimin në projektimin dhe trajnimin e muzeve.
Italia mbetet partneri kryesor ekonomik dhe tregtar i Shqipërisë, me një vëllim tregtar që tejkalon 3 miliardë euro dhe një pjesë tregu prej 20%.
Ndërkohë, Protokolli Itali–Shqipëri po shihet si një model inovativ për menaxhimin e çështjeve të migracionit, duke tërhequr interes gjithnjë e më të madh nga Komisioni Evropian dhe shtetet anëtare të BE-së.
