Në Gjykatën Themelore në Prishtinë ka nisur gjykimi në mungesë ndaj 53 të akuzuarve për Masakrën e Mejës dhe krimet në rajonin e Gjakovës.
As në këtë seancë, asnjëri prej tyre nuk ishte i pranishëm në sallë, dhe përfaqësohen nga avokatët mbrojtës.
Bëhet fjalë për një nga krimet më të rënda të luftës në Kosovë, të kryer mes 27 dhe 29 prillit 1999. Sipas aktakuzës, vetëm në Mejë u vranë 270 civilë shqiptarë, ndërsa trupat e viktimave u gjetën vite më vonë në varrezat masive në Batajnicë të Serbisë.
Në mesin e të akuzuarve janë ish-krerë të lartë ushtarakë dhe të sigurisë serbe, përfshirë Momir Stojanoviqin dhe Franko Simatoviqin.
Për të akuzuarit, të cilëve nuk u dihet vendndodhja, është lëshuar urdhërarrest ndërkombëtar.
