Ministri i Mbrojtjes, Ejup Maqedonci, ka vizituar sot Komandën e Doktrinës dhe Stërvitjes (KDS) në kazermën e Forcës së Sigurisë së Kosovës (FSK) “Skënderbeu” në Ferizaj, ku kanë filluar trajnimin bazik rekrutët e rinj.
Komandanti i KDS-së, gjeneral-brigade Jeton Dreshaj e ka njoftuar ministrin Maqedonci me mbarëvajtjen e gjithë procesit të rekrutimit, të stërvitjeve dhe trajnimeve që janë duke u zhvilluar.
Aktualisht në disiplina të ndryshme kemi mbi 500 ushtarakë të cilët janë duke u përgatitur. Vetëm në trajnimin bazë kemi 363 rekrutë në kuadër të procesit të rekrutimit të 612 ushtarëve të rinj.
Ministria e Mbrojtjes është e vendosur fuqishëm në ndërtimin e kapaciteteve tona ushtarake, si në rritjen e numrit të personelit ashtu edhe në edukimin, trajnimin, shkollimin dhe pajisjen me armatim modern sipas standardeve të NATO-s, thuhet në një komunikatë për media.
