Përgatiti: Sara Shehu
Mosvotimi i marrëveshjeve ndërkombëtare për disa muaj nga PDK-ja dhe AAK-ja, kishte bërë që Kosovës t’i rrezikohen fonde në vlerë rreth 300 milionë euro.
Njëkohësisht, Qeveria si kundërveprim ndaj PDK-së dhe AAK-së që nuk votonin marrëveshje ndërkombëtare, refuzonte t’i përgjigjej pyetjeve parlamentare.
Mirëpo, bllokada disamujore filloi të hiqet sot. Krahas LDK-së që vazhdimisht kishte qenë pro votimit, AAK-ja tregoi se e ka ndryshuar qëndrimin dhe tregoi arsyet për këtë.
“Aleanca për Ardhmërinë e Kosovës do të votojë. Po ashtu, ju them se Grup Parlamentar kemi diskutuar edhe me deputetin Haki Abazi, edhe ai është zotuar paraprakisht që do ta jap votën, për të vetmen arsye me pa fuqinë opozitare që e ka”, tha shefi i grupit parlamentar të AAK-së, Besnik Tahiri.
PDK-ja ndërkaq vazhdon t’i kundërshtojë këto marrëveshje.
“Si Grup Parlamentar i PDK-së në asnjë rrethanë nuk pajtohemi që sot të vijmë për diskutim dhe për votim marrëveshjet e tjera ndërkombëtare. Si Grup Parlamentar i PDK-së nuk do t’i votojmë, sepse vendi është nën masa dhe nën sanksione pikërisht nga BE”, tha shefi i grupit parlamentar të PDK-së, Abelard Tahiri.
Në seancën e sotme të Kuvendit, me mbi 80 vota u votuan gjithsej 5 marrëveshje ndërkombëtare, përfshirë ato për rehabilitimin e hekurudhës, ngrohjen solare të Prishtinës dhe një kredi për KOSTT-in.
Megjithatë, për shkak të disa mospajtimeve Kryeparlamentari Glauk Konjufca nuk ka hedhur në votim marrëveshjen ndërmjet Kosovës dhe Danimarkës për transferimin e të dënuarve në Danimarkë për të shërbyer dënimin me burg në Burgun e Gjilanit.
“Ka përputhje me ligjin për marrëveshjet ndërkombëtare, andaj kjo marrëveshje është rikthyer në pikën zero” , tha shefi i grupit parlamentar të LDK-së, Arben Gashi.
“Ata na kanë zgjedhur neve burgun tonë, pasi që kemi vlera të larta standarde”, tha ministrja e Drejtësisë, Albulena Haxhiu.
Numri total i marrëveshjeve ndërkombëtare që kanë qenë në pritje seancës së sotme, ka qenë 27.
Pasi AAK-ja pranoi t’i votojë marrëveshjet ndërkombëtare, Konjufca si Kryetar i Kuvendit ia kujtoi anëtarëve të kabinetit Kurti II, se e kanë obligim që t’i përgjigjen pyetjeve parlamentare. Kjo gjë është refuzuar nga Qeveria, pikërisht për shkak të bllokimit të marrëveshjeve ndërkombëtare.
