Merkatoja e Lazios mund të sjellë lëvizje në ditët e fundit të afatit kalimtar.
Klubi italian pritet të largojë Matteo Cancellierin, i cili është nën monitorimin e Genoas. Kjo e fundit po punon për të mbyllur marrëveshjen për rreth 4 deri në 5 milionë euro.
Nëse largimi i Cancellierit realizohet, Lazio ka piketuar Edon Zhegrovën si një nga alternativat për repartin ofensiv.
Bardhekaltrit po shqyrtojnë mundësinë e huazimit të sulmuesit kosovar nga Juventusi, pa detyrim blerjeje. Kjo formulë raportohet se është e pranueshme edhe për klubin torinez.
Zhegrova, i cili përfiton rreth 2.5 milionë euro në sezon, shihet si një lojtar që mund të mbulojë disa role në sulm dhe të jetë alternativë edhe për Mattia Zaccagnin.
27-vjeçari ka eksperiencë në futbollin italian dhe sezonin e kaluar zhvilloi 20 ndeshje në Serie A.
Megjithatë, përpara se të nisë operacioni për Zhegrovën, Lazio duhet fillimisht të mbyllë largimin e Cancellierit.
