Kryeministri i Kosovës, Albin Kurti, ka reaguar pasi të mërkurën janë rrëmbyer tre zyrtarë të Policisë së Kosovës në Leposaviq.
Shefi i qeverisë deklaroi se ata qëndronin rreth 300 metra në brendësi të territorit të Kosovës, transmeton Paparaci.
Ai shtoi se dyshojnë që policet janë rrëmbyer nga ushtria e Serbisë “si hakmarrje” e Serbisë pas arrestimit të kriminelit Millun Millenkoviq – Llune, të martën në veri të Kosovës.
Mes tjerash, Kurti kërkoi lirimin e menjëhershëm të zyrtarëve të rrëmbyer policorë.
Gjithashtu, kryeqveritari ka ftuar ndërkombëtarët që ta dënojnë këtë “akt agresioni” të Serbisë.
“Tre zyrtarë të policisë së Kosovës janë rrëmbyer sot në Leposaviq në vendin ku dikur kishte një rrugë ilegale të kontrabandës e që ndodhet rreth 300 metra në brendësi të territorit të shtetit tonë. Dyshojmë që ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës”, shkroi Kurti në Facebook.
“Policia e Kosovës është treguar tejet e vetëpërmbajtur këto javët e fundit.
Hyrja e forcave të Serbisë në territorin e Kosovës është agresion dhe synim për eskalim dhe destabilizim. Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë”, përfundoi ai.
