Kryeministri Kurti kërkon përgjegjës institucionale për vrasjen e Arlinda Zekajt

Kryeministri Albin Kurti ka deklaruar se institucionet përgjegjëse për sigurinë dhe drejtësinë kanë bërë një varg lëshimesh në trajtimin e rastit të vrasjes së Arlinda Zekajt.

Në mbledhjen e Qeverisë, ai tha se paralajmërimet e 49-vjeçares për rrezikun ndaj jetës së saj nuk kishin marrë përgjigjen e duhur nga institucionet.

Për të përcaktuar përgjegjësitë, Kurti ka kërkuar nga Ministria e Drejtësisë dhe ajo e Punëve të Brendshme raporte të detajuara, të cilat duhet të dorëzohen deri të enjten, para orës 18:00, dhe më pas do të bëhen publike.

Ai akuzoi gjithashtu sistemin e drejtësisë se shpesh mban anën e të fuqishmëve, në vend që t’i mbrojë qytetarët më të cenueshëm, ndërsa reformimin e tij e cilësoi urgjencë kombëtare.