Përgatiti: Fatlum Jashari
Përkundër qortimit publik dhe paralajmërimit nga Ndihmës Sekretari i Shtetit, James O’Brien, kryeministri Albin Kurti është i bindur se partneriteti i Qeverisë së tij me SHBA-në nuk është vënë në pikëpyetje.
I pyetur për deklaratën e O’Brien se SHBA-ja nuk do ta trajtojë si partnere Qeverinë e Kosovës nëse ajo nuk e trajton SHBA-në si të tillë, Kurti përsëriti qëndrimin paraprak lidhur me dinarin.
“Republika e Kosovës nuk ka partner aleat dhe mik sikurse SHBA-në, kështu e konsideroj dhe bashkëpunoj si kryeministër i Kosovës. Banka Qendrore e Kosovës ka prezantuar një plan 10-pikësh për zbatimin e rregullores së saj”, tha Kurti.
Ish-kryeministri, Ramush Haradinaj, theksoi qeveria duhet t’i marrë shumë seriozisht porositë e O’Brien.
“Pozicioni i tij është shumë i rëndësishëm dhe Kosova duhet të bëj kujdes… Amerikanët nuk kërkojnë lëshime, amerikanë kërkojnë Kosovën me vizion euro-atlantik, pra një Kosovë e mençur që di ta ecë agjendën e saj politike deri në NATO. Dhe, bëjnë vërejtje për veprime tona të njëanshme dhe për këto fitoret e vogla ditore që po i shkaktojnë pasoja synimit tonë strategjik”, tha Haradinaj.
Pasi tha se qasja e Qeverisë në raport me SHBA-në është e papranueshme, ish-zëvendëskryeministri Driton Selmanaj vlerësoi se ky është qortimi më i rëndë diplomatik ndaj Kosovës.
“Qortimin amerikan nuk e shoh në kontekst vetëm për këtë veprim, janë një sërë veprimesh të kësaj qeverie në tre vjet që ka ardhë deri te qortimi i rëndë nga aleati ynë strategjik. Ata nuk po thonë që nuk kemi të drejtë ta bëjmë këtë, që Kushtetuta jonë nuk e thotë këtë, ata po na thonë që veprime të tilla duhet të merren të koordinuara. Dhe unë mendoj se po të mos ishin veprimet e koordinuara nuk do ta kishim as pavarësinë e Kosovës”, tha Selmanaj.
Ndihmës Sekretari Amerikan i Shtetit, James O’Brien, e vlerësoi të pamjaftueshme periudhën tre mujore dhe 10 masat e prezantuara nga BQK-ja, si dhe kërkoi pezullimin e rregullores dhe angazhim për zgjidhjen e problemit.
