Kryeministri i Kosovës, Albin Kurti, së bashku me ambasadorët e akredituar në Kosovë, kanë bërë homazhe pranë Monumentit dedikuar Personave të Zhdukur me dhunë gjatë luftës, duke kërkuar angazhim më të madh ndërkombëtar për zbardhjen e fatit të tyre.
Kurti tha se edhe pas më shumë se dy dekadash, mbi një mijë persona vazhdojnë të jenë të zhdukur, ndërsa institucionet e vendit janë të angazhuara maksimalisht për zbardhjen e fatit të tyre.
“Bëjmë nderime për gjithë të zhdukurit edhe 1565 i kemi ende të pagjetur, komisioni qeveritar për Personat e Zhdukur, Instituti i Mjekësisë Ligjore, Policia e Kosovës dhe të gjitha institucionet e vendit tonë bëjnë përpjekje maksimale për të zbardhur fatin e më të dashurve tanë, të cilët u rrëmbyen të gjallë e të vdekur nga forcat armike të Serbisë së Millosheviqit. Duhet të kujtojmë që i fundit që u varros djali i vogël 9 vjeçar. Sinan Dauti nga Prekazi…Ne i bëjmë thirrje faktorëve ndërkombëtarë që të bëjnë trysni mbi Beogradin zyrtar dhe të zbardhë të vërtetën për të zhdukurit tanë meqenëse ata e mbajnë përgjegjësinë dhe ata e dinë të vërtetën. Janë edhe 11 varreza masive përveç atyre 5 që tashmë janë zbuluar e për të cilët Serbia nuk jep informacion, sepse është komunikuar nga vetë ata publikisht se janë 16 masive gjithsej e vetëm në njërën prej tyre që është zbuluar në Batajnicë i kemi 744 të pagjetur të zhvarrosur atje, ndërkaq gjithsej deri më tani janë rreh 1 mijë shqiptarë që janë zbuluar në varrezat masive në Serbi”, deklaroi ai.
Ai theksoi se përgjegjësia për zbardhjen e së vërtetës qëndron te Serbia, ndërsa kërkoi presion më të madh nga faktori ndërkombëtar, raporton Ekonomia Online.
“Atje ku është përgjegjësia atje është edhe e vërteta mirëpo ne nuk kemi juridiksion mbi Serbinë, faktori ndërkombëtarë evropian dhe amerikan duhet t’i bëjnë më shumë trysni Serbisë ashtu që të zbardhet e vërteta dhe përgjegjësit të dalin para gjyqit. Edhe në Kosovë tash e kemi mundësinë për vite me radhë që të dënohen pasi të gjykohen në mungesë kriminelët e shumtë të luftës qofshin urdhër -dhënës apo ekzekutor dhe për këtë prokuroria speciale e ka përkrahjen e plotë të qeverisë së Republikës gjithashtu edhe sistemi në përgjithësi. Janë duke punuar më shumë e më shpejt se përpara por unë besoj që duhet të punojnë edhe më shumë edhe më shpejt seç po bëhet meqenëse dëshmitarët po plaken shumë prej tyre edhe po ndërrojnë jetë dhe në këtë mënyrë vështirësohet përndjekja dhe sjellja përpara drejtësisë e kriminelëve serb të luftës”, tha ai.
