Përgatiti: Kastriot Tahiri
Karriget i mbeten bosh, për shkak që grupi i asamblistëve të Lëvizjes Vetëvendosje dhe atyre të AAK-së, vendosën ta bojkotojnë thirrjen e Seancës komunale në Prishtinë.
Arsyeja e bojkotit nga Vetëvendosja ishte zgjedhja e kryesuesit të kuvendit, për të cilën thanë se është në kohë të panevojshme dhe tendencioze pasi që në Gjykatën Themelore në Prishtinë është iniciuar një konflikt administrativ mes MAPL-së dhe Komunës së Prishtinës.
Por pavarësisht kësaj, mbledhja vazhdoi normalisht pasi që kuvendi komunal kishte kuorum, për të diskutuar rreth 16 pikave të vendosura në rend të ditës.
Në mesin e këtyre pikave, ishte edhe raportimi për punën 6-mujore të kryetarit.
“Kemi nënshkruar edhe ndërtimin e 5 shkollave, tri të tjera janë në ndërtim e sipër. Javën që lamë pas, isha në Japoni ku pata takime të shumta, u dakorduam për avancim të bashkëpunimit në fushën e kulturës, artit e teknologjisë. Janë duke u dizajnuar disa projekte të mëdha që do transformojnë kryeqytetin. Bashkë me këto janë duke u dizajnuar edhe platformat ndërlidhëse. Spitali i Prishtinës tanimë është duke u dizajnuar dhe do të fillojë së shpejti. Kemi ende sfida siç është problemi me mbeturinat, ku kemi ndarë mjete për blerjen e 8 kamionëve dhe 140 kontejnerëve të rinj… Për bujqit kemi ndarë 19 sera, 54 kultivatorë, kemi dyfishuar subvencionet për gratë…”, tha kryetari i Prishtinës, Përparim Rama.
Lëvdata për punën, Rama mori nga bashkëpunëtorët e tij partiakë e të koalicionit.
“Kryetari Rama edhe një herë po dëshmon që ka transparencë për punën që bën. Në këtë raport shihet se kryetari dhe drejtorët kanë bërë punë të mirë. Këto po dëshmojnë që Prishtina po transformohet”, tha Jeta Rafuna, këshilltare komunale e LDK-së.
“Te raporti, nëse e analizojmë, ka punë të mira. I përgëzoj të gjithë ata që kanë punuar. Një planifikim i mirë do ta mundësonte një jetë më të mirë për qytetarët”, tha Fatmir Dervishi, këshilltar komunal i PDK-së.
Ndërkaq, në këtë seancë u miratua edhe projekt-propozimi nga nënkryetari i komunës për subvencionimin e festivaleve kulturore në kryeqytet.
