Përgatiti: Armand Hoti
Skënder Javollit, i cili dyshohet për kanosje me armë ndaj rojës së objektit të Komisionit të Pavarur për Miniera dhe Minerale, i është caktuar masa e paraburgimit prej një muaji.
Foto, CD nga vendi i ngjarjes si dhe provat që gjenden të bashkangjitura në lëndë, gjyqtarja ka vlerësuar se ekziston dyshimi i bazuar se i njëjti ka kryer veprën penale për të cilën dyshohet, ashtu që më datë 21.11.2023 në Prishtinë në 15:30, ka shkuar te zyrat e Komisionit të Pavarur për Miniera dhe Minerale dhe duke përdorur armën ka kanosur tani të dëmtuarin Skender Canolli, i cili ishte roje në këtë vende, duke i thënë ‘’se kam ardhë me ba probleme’’ dhe nga xhepi i brendshëm i jaknes ka nxjerrë revolen dhe ka shtënë në ajër”, thuhet në vendimin e Gjykatës Themelore në Prishtinë.
Avokati i Javollit, Burim Halili, thotë se klienti i tij nuk e ka ekspozuar në asnjë moment revolen e mbushur me tetë fishekë, siç pohon arsyetimi i Gjykatës Themelore për caktimin e paraburgimit.
“Nuk kemi të bëjmë me përdorim të armës dhe nuk kemi të bëjmë me kërcënim se këtu pretendohet që është kërcënuar edhe sigurimi”, tha Halili.
Mbrojtja aludon se Skënderi shkoi në ndërtesën e KPMM-së, pasi qe i revoltuar sepse inspektorati i ka mohuar biznesit të familjes së tij operimin.
“E ka bërë për shkak se inspektorët, në shumë raste nuk e kanë lejuar të ushtrojë veprimtarinë e vet që e kanë si gurëthyes… ka qenë nën ndikim të alkoolit”, tha Halili.
Ndërkohë pas rastit në fjalë, KPMM-ja synon të rrisë nivelin e sigurisë.
“KPMM-ja është në fazën e zhvillimit të procedurave të prokurimit për kontratën e re të sigurimit fizik të objektit të KPMM-së. Në këtë kontratë do të përfshihet shtimi i numrit të rojeve në hyrje të objektit, nga 1 roje që është në kontratën aktuale, në 2 roje në kontratën e re”, thuhet në reagimin e KPMM-së.
Biznesi familjar i Skënder Javollit ka aplikuar në KPMM për leje për aktivitete të veçanta, mirëpo në mungesë të Bordit aplikacioni ka mbetur pa u shqyrtuar.
Kryetari i Komisionit për Ekonomi thotë se mungesa e Bordit si organ vendimmarrës në krye të KPMM-së, shkon në dëm të ekonomisë së shtetit.
“Mungesa e Bordit në KPMM, vërtetë e godet rëndë ekonominë e vendit sidomos sektorin e industrisë minerare dhe përpunuese në vend”, tha Ferat Shala, kryetar i Komisionit për Ekonomi.
Qeveria e Kosovës vazhdon të jetë e heshtur në raport me mosemërimin e Bordit të KPMM-së.
