Ish-futbollisti brazilian i Atletico Madridit, Rodrigo Fabri, i ka bërë thirrje Endrickut të largohet nga Real Madridi nëse vazhdon të ketë kaq pak minuta në dispozicion.
Endrick, i konsideruar si një prej talenteve më të mëdha të Brazilit, po përballet me një situatë të vështirë këtë sezon. Pas rikthimit nga lëndimi, 20-vjeçari ka regjistruar vetëm katër minuta lojë.
Fabri beson se sulmuesi brazilian duhet të kërkojë një klub ku mund të luajë rregullisht dhe të vazhdojë zhvillimin e tij.
“Është shumë i ri, ka talent dhe konsiderohet një lojtar kyç për të ardhmen e Kombëtares së Brazilit. Nëse nuk merr mundësi, gjëja më e mirë për të është të shkojë te një ekip tjetër ku mund të luajë dhe të zhvillohet si futbollist”, deklaroi Fabri.
Endrick kishte humbur katër ndeshjet e para të sezonit për shkak të një lëndimi, ndërsa rikthimi i tij deri tani nuk ka sjellë minuta të konsiderueshme në fushë.
