Në vetëm dy orë nga hapja e shitjes së parë, janë shitur mbi 10 mijë bileta për koncertin e shumëpritur të Kanye West në Tiranë, i planifikuar për muajin korrik.
Interesi i publikut ishte i menjëhershëm, me mijëra fansa që siguruan vendet e tyre brenda pak minutash nga nisja e shitjes. Sipas organizatorëve, kërkesa ka tejkaluar pritshmëritë, duke e kthyer këtë koncert në një nga eventet më të mëdha muzikore të organizuara ndonjëherë në vend.
Shitja e përgjithshme për publikun do të nisë të mërkurën në orën 12:00, ndërsa pritet një fluks edhe më i madh kërkesash. Organizatorët u bëjnë thirrje të interesuarve të jenë të gatshëm, pasi biletat mund të shiten me shpejtësi.
Çmimet e biletave nisin nga 261 euro, ndërsa për zonat VIP arrijnë deri në 339 euro.
Koncerti i Kanye West pritet të tërheqë jo vetëm publik vendas, por edhe fansa nga rajoni dhe më gjerë, duke e vendosur Tiranën në qendër të vëmendjes muzikore këtë verë.
