IBAS ka dalë me një njoftim drejtuar klientëve, duke paralajmëruar për rritjen e rasteve të mashtrimeve dhe pagesave të dyshimta në internet.
Në këtë njoftim, IBAS u bën thirrje qytetarëve që para çdo pagese online të verifikojnë me kujdes linkun dhe ueb-faqen ku po kryhet transaksioni, pasi faqet mashtruese shpeshherë duken pothuajse identike me ato zyrtare.
“Ju lusim që të verifikoni vegëzën/linkun nëse është zyrtar apo jo. Para realizimit të pagesave me kartelat IBAS, mund të na kontaktoni për verifikim nëse faqja është e sigurt,” thuhet në njoftim.
IBAS sqaron se në rastet kur qytetarët bien viktimë e mashtrimeve dhe kryejnë pagesa përmes faqeve të rreme, ata duhet të paraqesin ankesë, në mënyrë që të iniciohet procesi i kërkesës për kthimin e mjeteve.
Sipas IBAS, institucionet financiare që mundësojnë pranimin e pagesave përmes skemave Visa dhe Mastercard kanë detyrim që të trajtojnë rastet dhe të bëjnë rimbursimin e mjeteve te pala e dëmtuar, qoftë nga institucioni përkatës ose nga vetë mashtruesit.
Procesi i kthimit të parave, sipas njoftimit, mund të zgjasë deri në dy muaj, ndërsa klientët kanë të drejtë të paraqesin kërkesë për rimbursim brenda 30 ditëve, e në disa raste edhe më gjatë, te institucioni që ka lëshuar kartelën.
“Secili klient ka të drejtë të iniciojë kërkesë për kthimin e mjeteve te banka që ka lëshuar kartelën Mastercard ose Visa,” thuhet më tej.
IBAS u ka bërë thirrje qytetarëve për kujdes të shtuar gjatë përdorimit të kartelave bankare në internet.
