Përgatiti: Haris Ademi
Ambasadori Jeffrey Hovenier e tha prerazi, se raportet mes Shteteve të Bashkuara dhe qeverisë së Kosovës, tashmë janë ndikuar nga mosdëgjueshmëria për shtyrjen e zbatimit të rregullores së Bankës Qendrore, që e delegjitimon përdorimin e dinarit serb.
Në një paraqitje të jashtëzakonshme për media, diplomati amerikan tha se i qëndron në linjë intervistës së ndihmëssekretarit të Shtetit, James O’Brien, dhënë gjatë javës, për këtë çështje. Madje, demantoi deklaratat e qeveritarëve në Prishtinë, se kjo temë s’ka ndikuar fare në raportet mes dy aleatëve.
“Ai shprehu keqardhje që qeveria Kurti nuk i është përgjigjur kërkesës sonë. Dhe e tha qartë, që nëse kryeministri Kurti nuk do të na trajtojë si partnerë dhe e vë në pikëpyetje sa partner mund ta konsiderojmë këtë qeveri. Unë jam i shqetësuar se tash ka deklarime publike, që e pasojnë këtë intervistë, se sugjerojnë se partneriteti SHBA-Kosovë nuk është prekur, dhe nuk mund të preket nga kjo situatë. Duhet të jem i artë. Kjo thjesht nuk është e vërtetë. Kjo thjesht nuk është kështu. Sikurse ndihmëssekretari O’Brien deklaroi, kjo situatë tashmë e ka ndikuar kualitetin e marrëdhënieve mes dy qeverive tona”, tha Hovenier.
Sipas Hovenier, është shumë e rrallë që një zyrtar amerikan si O’Brien të dalë publikisht me këso deklarata kritike ndaj Kosovës, njësoj sikurse në Organizatën e Kombeve të Bashkuara, siç ndodhi më 8 shkurt në përballjen Kurti-Vuciq.
“Është shumë e rrallë që në Këshillin e Sigurimit të OKB-së, për përfaqësuesin amerikan në Këshill të Sigurimit të thotë gjëra kritike për një qeveri të Kosovës. Ambasadorja Greenfield e bëri këtë”, tha Hovenier.
Kërkesa amerikane bazohet në dy gjëra. Fillimisht të lejohet transferimi i fondeve nga Serbia, në përputhje me rregulloren e BQK-së dhe praktikat evropiane, për të cilën duhet të diskutohet në kuadër të dialogut në Bruksel. Derisa të zbatohet ky proces afatgjatë, duhet të ketë provizione të përkohshme për ta lejuar Beogradin të vazhdojë ofrimin e shërbimeve të nevojshme sociale për serbët e Kosovës.
Kryeministri Albin Kurti deri tash nuk ka hequr dorë nga rregullorja, derisa Banka Qendrore ka treguar se faza tranzicionale e zbatimit të saj pritet të zgjasë tre muaj.
