Barcelona po vazhdon punën për ndërtimin e skuadrës për sezonin e ardhshëm, me drejtuesit katalanas që kanë vendosur si prioritete kryesore afrimin e një sulmuesi dhe një qendërmbrojtësi të ri gjatë afatit kalimtar veror.
Klubi fillimisht synon të finalizojë transferimin e një sulmuesi, ku emri kryesor në listën e dëshirave vazhdon të jetë Joao Pedro. Pas kësaj, fokusi i Barcelonës do të zhvendoset plotësisht te përforcimi i repartit defensiv.
Një nga objektivat kryesorë për mbrojtjen është Alessandro Bastoni i Inter Milan. Sipas raportimeve, Barcelona ka muaj që mban kontakte me mbrojtësin italian, ndërsa klubi zikaltër pret ofertën e parë zyrtare nga katalanasit.
Interi raportohet se kërkon rreth 60 milionë euro për kartonin e 27-vjeçarit dhe dëshiron ta zgjidhë situatën sa më shpejt për të planifikuar merkaton verore.
Megjithatë, sipas gazetarit Matteo Moretto, trajneri Hansi Flick nuk është plotësisht i bindur nga profili i Bastonit. Tekniku gjerman thuhet se ka rezerva për përshtatjen e italianit me stilin e lojës që dëshiron të implementojë te Barcelona.
Për këtë arsye, Flick i ka kërkuar klubit të shqyrtojë edhe alternativa të tjera për qendrën e mbrojtjes. Një nga emrat që po monitorohet është Cristian Romero i Tottenham Hotspur, i cili shihet si opsion rezervë në rast se transferimi i Bastonit nuk realizohet.
Javët e ardhshme pritet të jenë vendimtare për të ardhmen e Bastonit dhe planet e Barcelonës për repartin defensiv në sezonin e ri.
