Goditet baza amerikane në Arabinë Saudite, plagosen 12 ushtarë amerikanë – dy prej tyre në gjendje të rëndë

Një sulm ndaj një baze amerikane në Arabinë Saudite ka lënë të plagosur 12 ushtarë amerikanë, dy prej tyre në gjendje të rëndë, ka bërë të ditur një zyrtar amerikan për agjencinë e lajmeve Reuters.

Sulmi, që ndodhi të premten, kishte në shënjestër Prince Sultan Air Base. Ai u krye me dronë dhe shkaktoi dëme në disa avionë amerikanë të furnizimit me karburant.

Ngjarja vjen vetëm një ditë pasi sekretari amerikan i Mbrojtjes, Pete Hegseth, deklaroi se ushtria e Iranit është “shkatërruar plotësisht”.

Kjo nuk është hera e parë që kjo bazë ajrore sulmohet nga Irani.

Më 1 mars, rreshteri i Ushtrisë amerikane, Benjamin N Pennington, 26 vjeç, u plagos në këtë bazë. Ai ndërroi jetë disa ditë më vonë.

Deri më tani, të paktën 303 pjesëtarë të personelit amerikan janë plagosur në luftën me Iranin.