Në Suhadoll në Mitrovicën e Veriut, rreth mesditës pjesëtarët e Policisë së Kosovës kanë përdorur armë.
Zëvendësdrejtori i Policisë së Kosovës për rajonin e veriut, Veton Elshani ka thënë se policia tentoi të arrestojë një person për të cilin dyshohej se posedonte narkotikë.
“I dyshuari ka goditur veturën e policisë dhe një polic. Ndodhi shkëmbimi i zjarrit. Nuk ka të plagosur as të arrestuar, por policia konfiskoi veturën e të dyshuarit” tha Elshani.
Në veturë është gjetur një sasi e caktuar e narkotikëve ndërkaq identiteti i të arratisurit është i njohur për Policinë. Nga kjo ngjarje një polic u lëndua lehtë. Policia është duke i kryer hetimet në vend të ngjarjes.
