Mohamed Salah pritet të jetë një nga emrat më të përfolur në merkaton e verës, pas vendimit për t’u larguar nga Liverpool si lojtar i lirë.
Prej kohësh, klubet nga Arabia Saudite kanë tentuar ta joshin sulmuesin egjiptian me oferta milionëshe, ndërsa së fundmi u raportua edhe për një interesim nga Bayern Munich, megjithëse në Gjermani këto lajme nuk gjetën shumë konfirmime.
Sipas mediumit turk A Spor, në garë për Salah është futur edhe Fenerbahçe. Klubi nga Stambolli e ka vendosur “faraonin” egjiptian në krye të listës së dëshirave dhe synon të bëjë një goditje të madhe në merkato për t’u rikthyer fuqishëm në garë për trofe.
Raportohet se Fenerbahçe është gati t’i ofrojë Salahut një kontratë trevjeçare me pagë prej 20 milionë euro neto në sezon, në përpjekje për të mposhtur konkurrencën e fortë për firmën e tij.
Nëse transferimi realizohet, Salah do të bëhej një nga futbollistët më të paguar në historinë e futbollit turk. Përveç aspektit sportiv, afrimi i tij shihet edhe si një lëvizje strategjike për rritjen e imazhit ndërkombëtar të Superligës turke, duke pasur parasysh ndikimin e madh mediatik dhe popullaritetin global të yllit egjiptian.
