Erdogan betohet si president i Turqisë: Do t’i përmbahem parimeve të Ataturkut dhe republikës laike

Presidenti turk, Recep Tayyip Erdogan u betua sot për një mandat të ri presidencial pesë-vjeçar.

“Betohem për nderin dhe integritetin tim para kombit dhe historisë së madhe turke se do të ruaj ekzistencën dhe pavarësinë e shtetit, se do t’i përmbahem kushtetutës, shtetit ligjor, demokracisë, parimeve dhe reformave të Ataturkut, dhe parimet e republikës laike”, tha 69-vjeçari në ceremoninë e inaugurimit në parlament në Ankara.

Ai, i cili është udhëheqësi më jetëgjatë i Turqisë, fitoi zgjedhjet e fundit presidenciale.

Në raundin e dytë, ai fitoi 52.2 për qind të votave dhe kështu mundi kundërshtarin, Kemal Kilicdaroglu.

Ndryshe, Kosovën në këtë ngjarje të shënuar e ka prezantuar presidentja, Vjosa Osmani.