Policia gjermane i ka dhënë fund një situate pengmarrjeje në një supermarket në Berlin, ku një grua ishte mbajtur peng për rreth 11 orë e 20 minuta. I dyshuari është arrestuar pas ndërhyrjes së forcave speciale.
Ngjarja përfundoi rreth orës 09:20 të së shtunës, kur njësitë speciale të policisë hynë në objekt dhe neutralizuan personin e dyshuar me një armë elektrike “Taser”, para se ta arrestonin.
Sipas mediave gjermane, një arkëtare e supermarketit ishte mbajtur peng nga një burrë, i cili dyshohet se e kishte kërcënuar me thikë pasi kishte hyrë në dyqan rreth orës 22:00 të së premtes.
Gjatë gjithë operacionit, zona përreth supermarketit ishte rrethuar nga policia, ndërsa në vendngjarje ishin angazhuar forca speciale, ambulanca, zjarrfikës dhe një numër i madh i automjeteve policore.
Negociatorët e policisë kishin qenë në kontakt të vazhdueshëm me pengmarrësin gjatë përballjes, ndërsa ende nuk është bërë e ditur nëse ai dhe gruaja njiheshin mes vete.
Punonjësit e tjerë që ndodheshin brenda supermarketit në momentin e nisjes së incidentit kanë arritur të largohen pa u lënduar dhe janë asistuar nga shërbimet emergjente.
Një punonjës i supermarketit ka deklaruar për gazetën gjermane “Bild” se personi i dyshuar kishte qenë fillimisht te arka dhe më pas kishte nxjerrë një thikë. Megjithatë, policia nuk e ka konfirmuar zyrtarisht këtë dëshmi.
Hetimet për rastin po vazhdojnë.
