Një arritje e rëndësishme në kujdesin pas lindjes: trajtim i shpejtë, efektiv dhe i qasshëm
Komisioni Evropian ka miratuar hedhjen në treg të ilaçit zuranolone (Zurzuvae) për trajtimin e depresionit pas lindjes, duke u bërë trajtimi i parë oral i licencuar në Bashkimin Evropian për këtë gjendje. Miratimi është bazuar në vlerësimin pozitiv shkencor të Agjencisë Evropiane për Barnat (EMA).
Përparësia e këtij ilaçi është aftësia për të zvogëluar simptomat depresive që në ditën e tretë të trajtimit, me përmirësim të dukshëm pas dy javësh dhe me efekt të mbajtur deri në ditën e 45-të, sipas studimit klinik SKYLARK.
Zuranolone merret një herë në ditë për 14 ditë dhe është një steroid neuroaktiv (NAS), modulues pozitiv alosterik i receptorëve GABA-A, proteina të përfshira në rregullimin e gjendjes shpirtërore dhe përgjigjes ndaj stresit.
Ilaçi është i disponueshëm vetëm me recetë dhe mund të ketë efekte anësore si përgjumja, marramendja dhe ndjenja e sedacionit. Nuk duhet të përdoret gjatë shtatzënisë dhe nuk rekomandohet gjatë gji dhënies, transmeton Telegrafi.
Depresioni pas lindjes është një gjendje serioze e shëndetit mendor që prek rreth 20% të grave pas shtatzënisë, por mund të shfaqet edhe te baballarët. Ajo karakterizohet nga trishtim i vazhdueshëm, ankth, lodhje dhe ndjenjë faji, duke penguar shpesh krijimin e lidhjes emocionale me foshnjën. Gjendja është e patrajtuar siç duhet, ndërsa opsionet ekzistuese kanë qenë kryesisht antidepresivë klasikë, të cilët shpesh nuk japin efekt të shpejtë, apo terapi psikologjike.
Ky miratim përbën një moment historik në shëndetin e grave dhe familjeve në Evropë, pasi deri më tani opsioni i vetëm farmaceutik ishte trajtimi intravenoz. Dr. Priya Singhal nga Biogen theksoi se kjo është një arritje e madhe në adresimin e një nevoje të paplotësuar në kujdesin shëndetësor, duke ofruar trajtim efektiv dhe më të qasshëm për depresionin pas lindjes.
Zuranolone u zbulua fillimisht nga kompania Sage Therapeutics, ndërsa në vitin 2020 Biogen mori të drejtat për zhvillimin dhe tregtimin jashtë SHBA-së (përjashtuar Japoninë, Tajvanin dhe Korenë e Jugut). Në gusht 2023, ilaçi u miratua nga FDA në SHBA, ndërsa në gusht 2025 nga MHRA në Britani.
