Në Qendrën Korrektuese të Dubravës është realizuar sot një operacion i gjerë kontrolli, me qëllim parandalimin e veprimtarive të kundërligjshme dhe forcimin e sigurisë brenda institucionit.
Sipas njoftimit të Shërbimit Korrektues të Kosovës (ShKK), gjatë bastisjes janë kontrolluar të gjitha hapësirat e brendshme dhe të jashtme të qendrës, përfshirë dhomat e të burgosurve, kuzhinën, lavanderinë, sallën e sportit dhe ambientet përcjellëse.
Në përfundim të operacionit, nuk është raportuar ndonjë gjetje e kundërligjshme.
Në këtë aksion kanë marrë pjesë edhe zyrtarë korrektues nga institucione të tjera, përfshirë edhe mbështetjen e njësitit special K9.
Operacioni është pjesë e angazhimeve të vazhdueshme të autoriteteve për të garantuar rendin dhe sigurinë në institucionet korrektuese të vendit.
