Përgatiti: Donisa Fazliu
Me autorizim të dhomave të specializuara dhe me asistim të zyrtarëve të EULEX-it e të Policisë së Kosovës, zyra e prokurorit të Specializuar ka kryer bastisje të mërkurën në shtëpinë e ish-këshilltarit tjetër të Hashim Thaçit, Ismail Syla.
Në aksionin që zgjati më shkurt se në dy ditët e kaluara, sipas avokatit Artan Çerkini, është konfiskuar vetëm një telefon.
“Asgjë nuk është konfiskuar përveç se një telefon, asgjë tjetër dhe se telefoni i përket zotit Syla. Arsyeja e bastisjes është si edhe në rastet e tjera, sipas tyre mund të gjenden prova me relevancë për procedurat të cilat janë duke u zhvilluar pranë dhomave të specializuara, por që nuk kanë dhënë detaje të tjera, derisa po cenohet një e drejtë kushtetuese privatësia dhe paprekshmëria e banesës”, tha Çerkini.
Sipas Çerkinit, Syla nuk është evidentuar, si i dyshuar në dokumente, derisa shprehu vërejtjen se ka pasur shkelje ligjore dhe kushtetuese.
“Zotëri Syla siç edhe të tjerët nuk e kanë fare statusin e personit të dyshuar, po edhe përkundër faktit që nuk e ka statusin ata po bastisen, mendoj që është shkelje kushtetuese dhe ligjore dhe ne këto shkelje do t’i adresojmë përmes mjeteve juridike në fazën adekuate të procedurës”, tha Çerkini.
Se aksionet e bastisjes nuk janë transparente e thotë edhe hulumtuesi në IKD, Lavdim Makshana.
“Sa i përket bastisjeve, Dhomat e Specializuara dhe zyra e prokurorit të specializuar kanë treguar jotransparencë ndaj publikut dhe ndaj qytetarëve të Republikës së Kosovës. Transparenca e tyre duhet të jetë gjithmonë në përputhje me Kushtetutën e Republikës së Kosovës, kodin e procedurës penale dhe kjo gjithmonë duke ruajtur atë që të mos dëmtohet procedura gjyqësore”, tha Makshana.
Përveç se operacionet po kryhen në mbështetje të Policisë së Kosovës dhe EULEX-it, nga Zyra e Prokurorit të Specializuar, nuk dhanë detaje të tjera për ATV-në, lidhur me aksionin e këtyre bastisjeve.
Kjo është bastisja e 5-të, që është ndërmarrë gjatë këtij viti, ndaj ish-bashkëpunëtorëve të Hashim Thaçit.
Të hënën, specialja kreu bastisje te Blerim Shala dhe Bashkim Smakaj, të martën u bastis shtëpia e Artan Behramit, ndërsa shkurt zyrtarët e Zyrës së Prokurorit të Specializuar kishin bastisur pronën e Adil Behramajt.