Barcelona do të shqyrtojë shitjen e sulmuesit Ferran Torres vetëm në rast se mbërrijnë oferta të konsiderueshme, sipas rapotimeve të gazetarit Fabrizio Romano.
Megjithatë, klubi katalanas nuk po e shtyn aktivisht lojtarin drejt largimit dhe as nuk po kërkon blerës potencialë në këtë fazë.
Torres, kontrata e të cilit skadon vitin e ardhshëm, është i vendosur të vazhdojë te Barcelona, edhe pse e ardhmja e tij do të varet nga disa faktorë.
Me Barcelonën që synon të transferojë sulmuesin e Atletico Madrid, Julian Alvarez, si dhe të rinovojë kontratën e Robert Lewandowskit me kushte të reduktuara financiare, hapësirat për Torres mund të ngushtohen ndjeshëm.
26-vjeçari ka pësuar një rënie të dukshme në aspektin e golave të shënuar, por trajneri i ekipit, Hansi Flick, vazhdon ta mbështesë atë, duke besuar se mund të rikthehet në formën e tij më të mirë.
Sulmuesi spanjoll iu bashkua Barcelonës me pritshmëri të mëdha, pas një periudhe premtuese në Manchester City, por deri më tani nuk ka arritur të ruajë vazhdimësinë e kërkuar në performancë.
Gjithsesi, brenda klubit ekziston bindja se Torres ka ende potencial për të dhënë kontribut të rëndësishëm, veçanërisht duke marrë parasysh moshën dhe përvojën e tij në nivele të larta të futbollit evropian. /Telegrafi/
